Venontan vendredon ĝis mardon Robert kaj mi pasigos en Varsovio. Ni longe pripensis kien vojaĝi, kaj elektis la polan ĉefurbon inter Dresden kaj Görlitz, Kopenhago, Bulgario kaj kelkaj aliaj ideetoj. Certe parton de tio ni nur ŝovis al alia tempo.

Mi jam trovis - dank' al goulo - paĝon kun adresoj de vegetaraj restoracioj, cetere ne nur pri Varsovio. Happy Cow kolektas vegetarajn kaj veganajn restoraciojn en la tuta mondo. Manĝo do estu neniu problemo.

Ni ankaŭ trovis tranokteblecon en la Esperanto-klubo. Mi jam tre antaŭĝojas vidi tiun viglan grupon.
Ankaŭ lernejtempa amikino loĝas en Varsovio, kaj mi ĝojas renkontiĝi kun ŝi post pli ol jaro. Ŝia fratino, kiu ĵus finis studadon en Berlino kaj ankaŭ translokiĝis al Varsovio bedaŭrinde dum la semajnfino ne ĉeestos. Ankaŭ ŝi estas amikino.

Nu, ni havos kelkan tempon por rigardi la urbon. Kion mi nepre volas rigardi estas la strato Krochmalna. Mi havas aŭdlibron "Infaneco en Varsovio" de Isaac Bashevis Singer, kaj en ĝi li rakontas pri sia infaneco en la juda kvartalo, en tiu strato. Mi simple volas vidi la straton, en kiu li diboĉis kiel knabeto. :)

Ĉu vi jam estis en Varsovio kaj havas konsilojn ajnateme? Mi volonte akceptos. Koran dankon.

Mi fuŝas miajn lecionojn. Parte la kialo estas, ke mi simple trotaksas la infanojn. En tia kvartalo la infanoj ja parolas la germanan, sed tre malbone skribas. Mi postulas tro kaj malesperigas ilin, rilate la germanan.
Pri matematiko mi ne havas tute malbonan, sed tamen ne bonan senton. Ĉefe estas du knaboj kiuj ĝenas la instruadon kaj daŭre malhelpas per laŭteco kaj nelaboremo. Hieraŭ mi havis duoblan lecionon kaj igis la infanojn paŭzi, ĉar 90 minutoj estas sufiĉe longaj. Post kvinminuta paŭzo mi faris kun ili kelkajn simplajn malstreĉig-celajn movojn (kiel skui brakojn kaj gambojn), kaj dum tio unu knabo tiom forte skuis siajn brakojn antaŭ mia vizaĝo (malintence), ke falis kaj gratiĝis miaj okulvitroj. Nun mi devas ankaŭ pri tio zorgi... telefoni kun la patrino, elekti kaj aĉeti novajn okulvitrojn, umi kun asekuro,... grrr.

Mi elektis malĝustan profesion, sed kion alian mi nun povus fari, se mi rezignus?

Dum IJK mi aŭskultis prelegon de Ulrich Matthias pri vegetarismo. Mi estas vegetarano ekde 1995 aŭ eĉ 1994 (mi bedaŭrinde ne ekzakte memoras la jaron, sed monato devus plejverŝajne esti junio aŭ julio, ĉar estis fino de la lerneja jaro), kaj la informoj ne estis tute novaj por mi, tamen mi ekemis membriĝi en vegetarana asocio. Ekde kelkaj monatoj mi gajnas almenaŭ iom da mono kaj do pensas ke mi ankaŭ finance subtenu asociojn, kies temoj gravas por mi.

Ekzistas vegetaran-asocio en Esperantujo; ĝi nomiĝas TEVA kaj bedaŭrinde momente eĉ ne havas retpaĝaron. Ne estas fiksa kotizo, sed oni ĝiru unufoje jare libervolan sumon da mono al UEA-konto. Mi ankoraŭ ne decidis ĉu mi faru tion. Ili dissendas unufoje jare revueton, sed rigardinte la eldonon de 2007 mi ne certas, ĉu mi eĉ legus ĝin.

Sed nu, mi ĵus iĝis membro de la germana vegetarana asocio VEBU. Baza kotizo estas 35 € jare, kaj oni kvarfoje ricevas allogan membro-revuon "natürlich vegetarisch". Kontraŭ 25 € pli oni eĉ ricevas aldone 12foje jare la revuon "Vegetarisch fit", kiun mi fakte jam plurfoje aĉetis kaj ofte pripensis aboni (sed neniam faris). Kutime abono de tiu dua revuo kostas pli ol 40 €, do mi pensas ke per pago de 60 € por kaj membreco kun membrorevuo kaj abono de Vfit mi kaj bone subtenas miajn celojn kaj profitos je du bonaj revuoj.

Aldone mi ŝatus iĝi membro de ADFC, la germana biciklista klubo. Robert jam estas individua membro (kontraŭ 38 € jare), kaj kontraŭ 10 € pli ni povus kune iĝi familiaj membroj. Ni nur devos tion aranĝi.

[

Nuna humoro

|

ĉagrenita

]

Fine de marto mi malaliĝis ĉe la universitato. Mi aldonis la studentan identigilon, karteton, por kiu mi antaŭ jaroj devis pagi 45 eŭroj da garantimono (mi memoras, ke mi pagis tiom, kaj mi memoras, ke oni menciis ĝin kiel garantimono). Bone, hodiaŭ mi konstatis ke ĝis nun mi ne rericevis la monon, kvankam jam pasis preskaŭ monato. Mi do altelefonis la sekretarion kaj do eksciis, ke mi rericevos la monon baldaŭ, sed nur 15 eŭrojn. La resto estas tenita kiel prilabora kotizo.

30 eŭroj kiel prilabora kotizo de tiu karteto kiu povUS havi multajn avantaĝojn kiel pagebleco en kopiejo, manĝejo, ktp., sed NE havas tion, do ne vere pli utilis ol papera folio? Pri tio mi ĉagreniĝas, ĉar ne estas logike.